IL-MINISTRU

Dr Michael Falzon twieled fis-16 ta’ Novembru 1961, lil Mosè Falzon u Carmela nee’ Said, li oriġinarjament ġejjin minn Għawdex.

Huwa ħa l-edukazzjoni fil-Kulleġġ San Albert il-Kbir f’Tas-Sliema u l-Belt Valletta u wara kompla l-istudji tiegħu post sekondarji, daħal jaħdem mal-Bank of Valletta fl-1979 bħala skrivan. Fl-1985 Dr Falzon daħal għall-kors tal-Liġi fl-Università ta’ Malta minn fejn iggradwa bħala Nutar fl-1989 u bħala Avukat fl-1991. Huwa kompla jitħarrreġ fl-istudji bankarji, fejn kiseb kwalifika internazzjonali bħala Assoċjat tal-Istitut tal-Bankiera Chartered, (ACIB). Għal numru ta’ snin kien il-Kap Eżekuttiv tal-Uffiċċju Legali tal-Bank.

Dr Michael Falzon serva bħala l-Maniġer tal-Elezzjonijiet tal-Uffiċċju Elettorali tal-Partit Laburista  ta’ Malta mill-1992 sal-2003. Hemmhekk bena u mexxa tim ta’ persuni dedikati li żgura li l-Partit Laburista kien organizzat professjonalment, u li l-proċess elettorali kien ġust, trasparenti u bla problemi. Dan il-professjonaliżmu kiseb ir-rispett ta’ kulħadd fil-pajjiż kollu, mhux biss fil-kamp tal-Partit Laburista, iżda wkoll mill-Partit Nazzjonalista u l-Kummissjoni Elettorali. Huwa kien involut ukoll f’diskussjonijiet li wasslu għall-emenda tal-Kostituzzjoni Maltija f’diversi każijiet.

Huwa serva wkoll bħala s-Segretarju Internazzjonali tal-Partit Laburista bejn l-1998 u l-2003. F’din il-kariga huwa tejjeb il-kuntatti tal-Partit Laburista ma’ partiti oħra tal-istess twemmin fl-Ewropa u r-Reġjun tal-Mediterran. Ix-xogħol internazzjonali ta’ Dr Falzon laħaq il-qofol tiegħu f’laqgħat ma’ mexxejja dinjija bħal Tony Blair tar-Renju Unit; Massimo D’Alema tal-Italja; Martin Schulz, il-President tal-Partit tas-Soċjalisti Ewropej fil-Parlament Ewropew; u l-Mexxej Laburista Awstraljan u eventwalment Prim Ministru Kevin Rudd.

Huwa kkontesta elezzjoni ġenerali għall-ewwel darba f’Marzu 2008 u ġie elett mit-Tieni u l-Għaxar Distrett Elettorali. Bejn Marzu 2003 u Ġunju 2008 serva wkoll bħala Viċi Kap għall-Affarijiet tal-Partit.

Sussegwentement, ikkontesta l-elezzjonijiet ġenerali tal-2013 u tal-2017. Wara l-elezzjoni tal-2017, li fiha ġie elett kemm mid-Disa’ kif ukoll mill-Għaxar Distrett Elettorali, inħatar Ministru għall-Familja, Drittijiet tat-Tfal u Solidarjetà Soċjali. Huwa kkontesta l-elezzjoni ġenerali ta’ Marzu 2022 u reġa’ ġie elett kemm mid-Disa’ kif ukoll mill-Għaxar Distrett Elettorali, u wara nħatar Ministru għall-Politika Soċjali u d-Drittijiet tat-Tfal. Fl-elezzjoni ġenerali ta’ Mejju 2026, huwa għal darb’oħra ġie elett kemm mid-Disa’ kif ukoll mill-Għaxar Distrett Elettorali, u sussegwentement inħatar Ministru għall-Politika Soċjali u l-Familja.

Dr Michael Falzon serva wkoll bħala Segretarju Parlamentari għall-Ippjanar u s-Simplifikazzjoni minn April 2014 sa Jannar 2016.

Dr Michael Falzon huwa miżżewweġ lil Anna Maria née Lia u għandhom żewġt itfal, Martina u Nathaniel.